CIÉ – An Soláthraí Iompair Poiblí is mó in Éirinn

Ár Stair

Bunaíodh Córas Iompair Éireann (CIÉ) an 1 Eanáir 1945 faoin Acht Iompair, 1944. Tugadh le chéile ann Great Southern Railways (GSR) agus an Dublin United Tramway Company (DUTC). Bhí seirbhísí iarnróid, busanna agus leoraithe á bhfeidhmiú ag an GSR. Bunaíodh an comhlacht sin féin in 1925 nuair a cónascadh na comhlachtaí iarnróid go léir a bhí lonnaithe laistigh den Saorstát in aon eintiteas amháin. Faoi na hAchtanna Iompair, 1932 agus 1933, tugadh cumhacht don GSR a chuid iomaitheoirí ar bhóithre a fháil go héigeantach. Ba í an fháil ba shuntasaí a rinne sé ná an Irish Omnibus Company, réamhtheachtaí Bhus Éireann.

Le hAcht Iompair, 1950, rinneadh comhlacht leathstáit de CIÉ. I 1958 ghlac CIÉ chuige féin seirbhísí bóthair agus iarnróid Great Northern Railway a bhí lonnaithe laistigh den Phoblacht. Roimhe sin, bhí an chuideachta sin ag feidhmiú mar chomhlacht trasteorann faoi chomhbhainistíocht an dá rialtas.

Ar an 2 Feabhra 1987, faoin Acht Iompair (Atheagrú Chóras Iompair Éireann), 1986, bunaíodh trí fhochuideachta de chuid CIÉ:

• Bus Átha Cliath (Dublin Bus), a chuireann seirbhísí bus ar fáil i gCathair Bhaile Átha Cliath.
• Bus Éireann, a chuireann seirbhísí bus cúige, seirbhísí Expressway agus seirbhísí bus cathrach ar fáil i gCorcaigh, i Luimneach agus i nGaillimh.
• Iarnród Éireann (Irish Rail), a chuireann seirbhísí iarnróid ar fáil, lena n-áirítear na seirbhísí trasteorann Enterprise a oibrítear i gcomhpháirt le Northern Ireland Railways. Feidhmíonn sé Calafort Ros Láir freisin.

Chomh maith leis na croí-oibríochtaí a chuirtear i gcrích trína fhochuideachtaí, feidhmíonn Cuideachta Shealbhaíochta CIÉ CIÉ Tours, cuireann sí réimse leathan seirbhísí comhroinnte ar fáil ar fud an Ghrúpa, agus bainistíonn sí punann shuntasach maoine.

Grúpa CIÉ inniu

Is é Grúpa CIÉ an soláthraí iompair phoiblí is mó in Éirinn fós. Le breis agus 12,000 fostaí, d’iompair an Grúpa 350 milliún paisinéir in 2023. Oibríonn an Grúpa i ndlúthchomhar leis an Roinn Iompair, leis an Údarás Náisiúnta Iompair agus le páirtithe leasmhara tábhachtacha eile. Mar thoradh ar infheistíocht chaipitil nach bhfacthas a leithéid riamh roimhe seo, tá fás suntasach ar sheirbhísí beartaithe sna blianta atá romhainn. Tá Straitéis Inbhuanaitheachta an Ghrúpa ag athrú ár seirbhísí agus ár n-oibríochtaí go múnla gnó ísealcharbóin atá go hiomlán ciorclach.